အဝိဇ္ဇါ ပိတ်ခါဆို့၊ မိစ္ဆာမြို့ပြင်ပြင်

စွယ်စုံကျမ်းမှာအတိအလင်းဖေါ်ပြမှတ်တမ်းတင်ခဲ့လျက်နဲ့
ကျောင်းသုံး ပြဌာန်းစာအုပ်တွေမှာပါရှိခဲ့လျက်နဲ့
မိန့်ခွန်းတွေ၊ စာမှတ်တမ်း အသံမှတ်တမ်းတွေမှာ အထင်အရှား ဖေါ်ပြခဲ့ပါလျက်နဲ့
"ဘယ်တုန်းကမှမရှိခဲ့ဘူး" ဆိုတဲ့ စကားကို
ဘယ်လိုကြောင့်များ ပြောရဲကြပါလိမ့်ဆိုတာကို စဉ်းစားမရခဲ့ဘူး။

ဒီနေ့ CNN သတင်းတစ်ပုဒ်ဖတ်လိုက်တော့
(REF: https://edition.cnn.com/…/flat-earth-conference-…/index.html)
- "YouGov" က အရွယ်ရောက်ပြီးသူ အမေရိကန် ၈၀၀၀ ကို ၂၀၁၈ မှာ လုပ်ထားတဲ့ ဆာဗေးအရ ၆-ရောက်မှာ ၁-ရောက်က ကမ္ဘာကြီးလုံးတယ်ဆိုတာ သိပ်မသေချာဘူးလို့ ဆိုကြတယ်။
- Datafolha Institute ရဲ့ ဘရာဇီးလ်လူမျိုး ၂၀၀၀ ကျော်ကို မေးမြန်းထားတဲ့ ၂၀၁၉ ဆာဗေးအရ သူတို့ထဲက ၇-ရာခိုင်နှုန်းက ကမ္ဘာကြီးလုံးတယ်ဆိုတာ လက်မခံကြဘူး ဆိုပဲ။
- အခုသီတင်းပတ်ထဲမှာ အမေရိကန်ပြည်ထောင်စု၊ တက္ကဆက်စ်ပြည်နယ်၊ ဒါးလက်စ် မြို့မှာ တတိယအကြိမ်မြောက် "ကမ္ဘာပြား နိုင်ငံတကာညီလာခံ" ကျင်းပရာမှာ လူ ၆၀၀ ကျော်တက်ရောက်ကြတယ်။ ဘရာဇီးလ် ဗြိတိန် နဲ့ အီတလီ နိုင်ငံတွေမှာလည်း အလားတူ ညီလာခံမျိုးတွေ ကျင်းပကြသတဲ့။

ဒီ အဖြစ်အပျက် အချက်အလက် တွေကို ကြည့်ရင်
အကိုးအကား အထောက်အထား အချက်အလက်တွေနဲ့ ဘယ်လိုပဲ ဟောဟော ပြောပြော
လူသားတွေရဲ့ ဆင်ခြင်တုံတရားကင်းမဲ့မှု မိုက်မဲမှု တစ်ယူသန်မှု စိတ်နှလုံးသားအမှောင်ကျနေမှု တွေ ကို ဖယ်ရှားဖို့မလွယ်ဘူးဆိုတာကို သိသာတယ်။

မင်း နှင့် ကတိ သစ္စာ

ဖိုးတော်၏ညီတော် ပင်းတလဲးမြို့စားမင်းသားသည် ဖိုးတော်ထံ လှာပြီးလျှင် နောင်တော်-ငမောင်တို့ ယခုအခါ ကျွန်တော်တို့ ကို ကျော်လို့ ဖုံးလွှမ်းနေသည်ကို ကြည့်နေမည်လား ဟုပြောရာ ဖိုးတော်က ငမောင် ဖုံးလွှမ်းနေသည်ကို ညီခင်မတတ်နိုင်ဘူးလား ဟု မေးတော်မူရာ ညီခင်တတ်နိုင်ပါရဲ့ နောင်တော် ထီးနန်းကို စံရလျှင် ညီခင်ကို မည်ကဲ့သို့ ထားမည်လဲးမေးသော် ဖိုးတော်က အစ်ကိုနန်းစံ ညီနန်းရံပ ဟု မိန့်ချက်အရ ပင်းတလဲးမင်းသားသည် တရံရောအခါ  အင်းဝမြို့နန်းတော်သို့ အမှတ်မဲ့ဝင်၍ ဖောင်းကားမင်းကို လုပ်ကြံရာ ဖောင်းကားမင်းကံကုန်လျှင် ဖိုးတော်ကို ပင်းတလဲးမင်းသားက ထီးနန်းသိမ်းပိုက်ရန် မင်း အဖြစ်သို့ တင်မြှောက်တော် မူလေသည်။
မင်းအဖြစ်သို့ တင်မြှောက်ပြီးနောက် ပင်းတလဲးမင်းသားက အထက်ကဘိ ယှိသည်အတိုင်း အိမ်ရှေ့ အရာကို အကြိမ်ကြိမ်တောင်းရာ ဖိုးတော်က ညီခင် နောင်တော်နှိုက် သားတော်ကြီးတွေ များလျက်ဖြစ်သောကြောင့် အိမ်ရှေ့ အရာကိုချီးမြှင့်ရန် ခဲယဉ်းခြင်းယှိနေကြောင်း မိန့် တော်မူသည်ကို ပင်းတလဲးမင်းသားက ငါ့ကြောင့် နောင်တော် ထီးနန်းရသည်ကိုလျက် ကျေးဇူးမထောက် သစ္စာမရှိသူဖြစ်သည်ဟု စိတ်နှိုက်အမှတ်ထားပြီးလျင်  တနေ့သနှိုက် ဖိုးတော်မင်းတြားကြီး ဆင်တော်စီး၍ မြို့ပြင်သို့ထွက်တော်မူသောအခါ ပင်းတလဲးမင်းသားသည် ကွယ်ရာကချောင်း၍ သေနတ်နှင့်ပစ်ရာ ဖိုးတော်မင်းတြား၏ နံဘေးလက်ကြား ဂျိုင်းအောက်ကို ကျည်ဆန်ဝင်ထွက်သွားလေသည်။ ကိုယ် အင်္ဂါတို့ ကို တစုံတရာ မခိုက် ယှိချေသည်။
ဤအခါ နောက်ပါ ကိုယ်ရံအမှုထမ်းတို့ ဝိုင်းဝန်းလိုက်လံဖမ်းဆီးရာ မိကြသဖြင့် ညီတော် ပင်းတလဲးမင်းသား ဖြစ်ကြောင်း သံတော်ဦးတင်ရာ ဖိုးတော်မင်းတြားက မျက်တော်မူသောကြောင့် ညီတော်ဖြစ်သော်လည်း ထောက်ညှာစရာမယှိ သွားမည်းတိုင်း လမ်းသွားရန် သုတ်သင်စီရင်ရမည် ဟု မိန့်တော်မူချက်အရ အာဏာသားတို့က ပင်းတလဲးမင်းသားကို ရေမှာချ၍ သတ်လေသည်။
ယင်းသည့်အကြောင်းကို ငါတို့လက်ထက် အဖြစ်အပျက်မှန်သမျှကို  ရာဇဝင်နှိုက် ထုတ်ဖော်၍ မပြရဟု ဖိုးတော်မိန့်ချက်အရ  ရာဇဝင် မဖော်မပြရပဲး  ချွင်းချန်ထားရသည် ဟု ဘုံကျော်ဆရာတော်ဘုရား မိန့် တော် မူသော မှတ်သားချက်ပုရပိုက်ကို ဖတ်ရဘူးဧည့်။

(မှော်ပီဆရာသိန်းကြီး ၏
"ပစပ်ရာဇဝင်" (၁၉၆၇၊ ဩဂုတ်လ)
ပ-ဒု ၂ တွဲပေါင်း ၊  အေးအေးစာပေတိုက်
စာ ၄၀-၄၂ မှ မူရင်းသတ်ပုံအတိုင်း ကောက်နှုတ်ချက်)

မှတ်ချက်။
ဖိုးတော်-----ဘိုးတော်ဘုရား(ဗဒုံမင်း)
ငမောင်-----ဖောင်းကားစားမောင်မောင်
အထက်ကဘိ-----အထက်ကတိ (ယခင် ကတိပြုခဲ့သည့်အတိုင်း)

နေ့တိုင်းကြားက ထူးခြားလိမ္မာ

ဆန့်ကျင်ဘက်သား၊ မိတ်ဆွေထား၊ အများပျက်စီးမည်

ဖွတ်မျိုးသည် ပုတ်သင်မှ ချမ်းသာကိုမရသကဲ့သို့
ယုတ်မာသောအဆွေခင်ပွန်းနှင့်
ပေါင်းဘော်သောသူသည်
စင်စစ် ချမ်းသာကိုမရ။
ကိုယ်ကို ပျက်စီးခြင်းသို့သာ ရောက်စေ၏။
(၅၅၀ ဇာတ်တော်များ၊ ဇာတ်တော်အမှတ်-၁၄၁၊ ဂေါဓာဇာတ် မှ ကောက်နှုတ်ချက်။)

Friendship with bad company causes ruin

One should never make friends of the wicked,
for such act will bring the sorrow and ruin in his life,
like a single wicked chameleon has caused the bane of all iguanas.
****************************************

ရနိုင်ခဲကုန်သော ပုဂ္ဂိုလ်နှစ်ဦး

လောက၌ ရနိုင်ခဲကုန်သော ပုဂ္ဂိုလ်နှစ်ယောက်တို့သည် အဘယ်နည်း။
အကြင်ပုဂ္ဂိုလ်သည်ကားရှေးဦးစွာ ကျေးဇူးပြုတတ်၏၊ အကြင်ပုဂ္ဂိုလ်သည် ပြုဖူးသောသူ့ကျေးဇူးကို သိ၍ ပြုဖူးသောကျေးဇူးကို ထင်စွာ ပြလေ့ရှိ၏။
ဤပုဂ္ဂိုလ်နှစ်ယောက်တို့သည် လောက၌ ရခဲကုန်၏။
(အဘိဓမ္မပိဋက၊ ပုဂ္ဂလပညတ်ပါဠိတော်၊ နိဒ္ဒေသ၊ ၁ - ဧကကပုဂ္ဂလပညတ်၊ အပိုဒ်-၈၃၊ မြန်မာပြန်)

Two Rare Persons

Which two persons are something of a rarity in this world?
He: who does good first, and he: who openly recognizes it.
Such two persons are rare in this world.
****************************************

ခိုင်းသူအမိုက်၊ ကဲ့ရဲ့ထိုက်၏

ပညာသမ္ပဇဉ်၊ ဉာဏ်မယှဉ်ပဲ
ဉယျာဉ်သည်မိုက်၊ စရိုက်မကောင်း
မျောက်အပေါင်းကို၊ ရေလောင်းခိုင်းငြား
ကျိုးပျက်ပြား၏၊ တရားအမြစ်
စစ်သော်တမူ၊ အရင်းယူက
ခိုင်းသူအမိုက်၊ ကဲ့ရဲ့ထိုက်၏။
(မန်လည်ဆရာတော်၊ မဃဒေဝ၊ အပိုဒ် ၂၀၁)

မိုက်မဲသောဉယျာဉ်မှူးသည် ပညာဉာဏ်မယှဉ်ဘဲ အကျင့်စရိုက်မကောင်းသော မျောက်အပေါင်းကို သစ်ပင်များရေလောင်းခိုင်းရာ ဉယျာဉ်တစ်ခုလုံးပျက်စီးကုန်၏။ ဤသို့ဖြစ်ရခြင်း၏ အကြောင်းတရားအား ဆန်းစစ်သော် ထိုသို့ခိုင်းစေသူ ဉယျာဉ်မှူးမိုက်ကိုသာလျှင် ကဲ့ရဲ့ရှုံ့ချအပ်ပေသည်။

When the foolish gardener recklessly encouraged the abysmal monkeys water the plants, the whole garden went ruined. The root cause of that implication is only because of that foolish gardener and he alone ought to be criticized.